د كوكنارو ناوې

 ګله يم

    ښايسته 

      زهرجنه

نشتر په لاس

د زهرو پر كروندو كې

                            لمده ـ  خيشته

كوكنارو ته وينه

                    څڅوم.

ګله يمه

په سويل كې غړيدلې

په لوديځ كې لويه شوي

په ختيځ كې سينګار شوى

په شمال كې واده شوى

زه ناوې د كوكنارو يم

د واده نڅا مې ګډه پر كرونده ده

زه د زهرو پوروړې

رپيږم

مړاوې كيږم

مړه كيږم.

ګله يم،

د اغزو سره په درد خاندم

ژاړم

پلار مې پوروړى د زهرو

زه پوروړې د عاطفې يم

زه پوروړې د مينې.                             

زه د كوكنارو ناوى

په سويل كې غړيدلې

په لوديځ كې لويه شوي

په ختيځ كې سينګار شوى

په شمال كې واده شوى

مړاوى

غړنده

زه د مينې پوروړې

زه د عاطفې پوروړې.