کابل ناتهـ، Kabulnath



 

 

 

 

 

 

 

 

Deutsch
هـــنـــدو  گذر
آرشيف صفحات اول
همدلان کابل ناتهـ

دريچهء تماس
دروازهء کابل

 

 

 

 

 

 
 

               صدیق کاوون

    

 
زخمي آواز

 

 

د فاصلو د تورو غرونو له شا
جانانه ستا زخمي آواز راځي
د چنارونو له شهيدو پاڼو
د وزرماتو وږمو ساز راځي


*****


په ژَړَغونو اننگو کې دې بيا
د پلوشو ماتې هيندارې وينم
د مړاوو شونډو په گلپاڼو کې دې
د مرورې خندا لارې وينم


*****


بيا دې د زړه جونگړې اور اخيستی
بيا دې سوځيږي آرمانونه پکې
بیا دې د هيلو باغ ږلۍ وهلی
بيا دې رژېږي سره گلونه پکې


*****


چا د سپېڅلي بغاوت په نامه
تاته لمنه کې سکروټې راوړې
چا د سرونو د ليلام په بدل
له تور بازاره خپلې گټې راوړې


*****


کله د دين په پلمه وسوځېدې
کله « دونيا » درته بلا راوسته
چا دې خندا له شوڼدو وزبېښله
چا دې سرو سترگو ته ژړا راوسته


*****


د بتخانې زاړه سادن نيولې
د خوش باوره زايرانو لاره
دگل په وينو باندې ولمبېده
د رياکارو زاهدانو لاره


*****


ما ويل ساه د پسرليو به شې
په شنه ځولۍ کې به گلان راوړې
ما ويل ورېځه به شې و به ژاړې
وچو ميرو ته به باران راوړې


*****


ورېځه خو شولې خو باران نه شوې
د پسرلي د گلو کان نه شوې
پر تاندو هيلو دې غدۍ پرېوته
نور د هر چا شوې، د خپل ځان نه شوې


*****


د فاصلو د تورو غرونو له شا
سلگۍ دې اورمه، ژړا دې اورم
د زړه دونيا دې تورو شپو نيولې
د آرمانونو واويلا دې اورم


*****


خو د رڼا الاهه وايي راته
شپه به سبا شي، سباوون به راشي
تورې ارواوې به له ښاره وځي
د لمر د لوڼو نوی يون به راشي


*****


بيا به غوټۍ شې، بيا به وغوړېږې
د مستو نجنو د پېکيو به شې
پر وچو دښتو به غاټول وکرې
جانانه سا د پسرليو به شې.

بالا

دروازهً کابل

الا

شمارهء مسلسل   ۴۰۶    سال هــــــــــژدهم                حمل/ ثور           ۱۴۰۱    هجری  خورشیدی         شانزدهم اپریل   ۲۰۲۲